سياسة الخصوصية
نكتبها بوضوح لأن اللي تشترينه يخصّچ إنتِ. هاي كل شي نجمعه، وكل شي ما نجمعه.
شنو نجمع
لمّا تطلبين، نحتاج ثلاثة أشياء بس:
- • الاسم — أي اسم للاستلام، مو لازم اسمچ الكامل.
- • رقم الموبايل — حتى نتصل ونأكّد ويوصلچ المندوب.
- • المحافظة — لحساب التوصيل.
وملاحظة اختيارية إذا تحبّين تكتبين نقطة دالّة. وبس.
شنو ما نجمع
- • ماكو حساب إجباري. تگدرين تطلبين كضيفة بلا تسجيل.
- • ماكو بيانات دفع. الدفع عند الاستلام — ما نشوف بطاقة ولا رقمها.
- • ماكو موقع جغرافي ولا وصول للكاميرا ولا لجهات الاتصال ولا للصور.
- • ماكو بريد إلكتروني مطلوب.
قياس الزيارات
نعدّ كم مرّة انفتحت كل صفحة، وبس. بلا رقم إنترنت، بلا كوكيز، بلا معرّف زائر. العدّاد يجاوب «شنو ينشاف» — ما يجاوب «منو شاف».
وإذا دوّرتِ بالموقع، نصّ بحثچ ما ينخزن — ينشال قبل التسجيل لأنه يخصّچ إنتِ.
صفحة صحّة الصدر
الصفحة التعليمية عن صحّة الصدر مستثناة من أي تتبّع إعلاني، بطبقتين منفصلتين بالكود. أي شي تختارينه أو تقرينه هناك ما ينخزن، وما يُستعمل بإعلان ولا باقتراح قطعة ولا بأي مكان ثاني. هاي معلومة صحّية، وتُعامل كذلك.
التطبيق
تطبيق لَيس يتعامل بنفس القواعد فوق، وزيادة:
- • السلّة تنحفظ بتلفونچ — على جهازچ وبس، ما تنرسل لنا إلا لمّا تثبّتين الطلب.
- • ماكو إعلانات ولا تتبّع داخل التطبيق.
- • التطبيق ما يطلب أي صلاحية من تلفونچ.
الإشعارات
إذا فعّلتِ الإشعارات بنفسچ — ما تنفعّل لحالها أبداً — ينخزن عندنا عنوان إشعار واحد يخصّ متصفّحچ، وبس.
- • ما ننخزن اسمچ ولا رقمچ ولا مقاسچ ويّاه، وما نربطه بطلباتچ ولا بحسابچ.
- • الإشعار اللي يوصلچ عام للكل — قطع جديدة أو عرض. ما نبعث ولا إشعار يخصّ طلبچ أو مقاسچ.
- • نصّ الإشعار يجي من خادمنا مباشرةً، ما يمرّ بگوگل ولا بآبل.
- • توقّفينها بأي وقت من نفس الزر، وينمسح العنوان عدنا.
وما نعرض زرّ الإشعارات بصفحة صحّة الصدر إطلاقاً — نفس سبب استثناء قياس الإعلانات منها.
منو يشوف معلوماتچ
فريق لَيس بس، ولغرض تجهيز طلبچ وتوصيله. والمندوب يشوف الاسم والرقم والعنوان حتى يوصّل — ما يشوف شنو بالعلبة، والتغليف ما يبيّن محتواه من برّا.
ما نبيع معلوماتچ ولا نأجّرها ولا نبادلها مع أي طرف.
كم تبقى
بيانات الطلب تبقى بسجلّ المتجر للمحاسبة والإرجاع. تريدين نحذف معلوماتچ؟ راسلينا وننفّذها — إلا السجلّ المحاسبي للطلبات المكتملة، هذا نحتفظ بيه.
تواصلي ويانا
أي سؤال عن خصوصيتچ: واتساب +964 775 337 7033 — كادر نسائي بالكامل.